Транспарт
раёна
Глыбоцкі раён мае
зручнае эканоміка-геаграфічнае становішча, якому садзейнічае густая
транспартная сетка. Транспартная сістэма складаецца з трох відаў транспарту:
аўтамабільнага, чыгуначнага і трубаправоднага, якія функцыянуюць самастойна і
дапаўняюць адзін аднаго.
Каля 25
гадоў таму назад у раёне дзейнічаў аэрапорт і адпаведна паветраны транспарт, а
да 50-ых гадоў ХХ стагоддзя вялікае значэнне меў гужавы транспарт.
Праз
тэрыторыю раёна пралягаюць 2 міжнародныя аўтамагістралі: Полацк-Вільнюс (Р 43, 105 км) і Мінск-Рыга (Р 3, 34 км), якія перасякаюцца ў
Глыбокім, а таксама дарогі абласнога
значэння – Празарокі-Дзісна, Зябкі-Ушачы. Густая сетка асфальтаваных дарог
раённага значэння злучае Глыбокае з усімі аграгарадкамі, з цэнтрамі сельсаветаў
і сельскагаспадарчых арганізацый. Працягласць аўтамабільных дарог агульнага
карыстання ў межах раёна 809
км, з іх – 272 км асфальтаваныя. Будаўніцтвам новых дарог
у раёне займаецца ДРСУ-145, а абслугоўваннем – ДЭУ-35. Па аўтамабільных дарогах
ажыццяўляецца перавозка прамысловай і сельскагаспадарчай прадукцыі экспартнага
і імпартнага прызначэння, а таксама мясцовыя перавозкі грузаў і пасажыраў.
Галоўным прадпрыемствам, якое іх ажыццяўляе ў найбольшых аб’ёмах з’яўляецца ААТ
"Аўтатранспартнае прадпрыемства № 16
г. Глыбокае”. Гісторыя яго пачынаецца 2 снежня 1953
года. З 1959 года вытворчыя памяшканні размешчаны па вуліцы Чырвонаармейская.
Для грузавых і пасажырскіх перавозак у прадпрыемства маецца 30 вялікагрузных
аўтамабіляў, 60 аўтобусаў, некалькі спецыялізаваных аўтамабіляў і аўтапрычэпаў.
Прадпрыемства аказвае паслугі арганізацыям раёна, абслугоўвае турыстычныя і
экскурсійныя маршруты.
Аўтавакзал
у г. Глыбокае мае аўтамабільныя пасажырскія сувязі з Рыгай, Мінскам, Віцебскам,
бліжэйшымі раённымі цэнтрамі і буйнымі населенымі пунктамі раёна. Для
абслугоўвання насельніцтва горада маецца 10 маршрутаў гарадскога аўтобуса.
Паслугамі таксі і маршрутак займаюцца прыватныя прадпрыймальнікі.
Дзве
чыгуначныя магістралі пралягаюць праз Глыбоччыну: Маладзечна – Полацк,
Круляўшчызна – Лынтупы. Самая доўгая (82 км) і старэйшая ( з 1907
года) працягнулася ў паўднёва-усходняй частцы раёна і мае 4 станцыі: Падсвілле,
Баравое, Зябкі, Загацце, а таксама прыпыначныя пункты: Шыпы, Замошша, Палівачы,
Кульгаі. У гады І сусветнай вайны з Круляўшчызны праз Глыбокае на захад пралёг
60-кіламетровы ўчастак другой магістралі з прыпынкамі ў Журках і Канстанцінавым
Двары. Будаўніцтва чыгунак значна палепшыла ўмовы перамяшчэння грузаў і
пасажыраў, а таксама паслужыла больш хуткаму эканамічнаму развіццю населеных
пунктаў, напрыклад, Падсвілля. Чыгуначная станцыя г. Глыбокае – буйнейшая і
важнейшая па колькасці грузапасажырскіх перавозак.
Трубаправодны
транспарт раёна – самы малады. Праз край у пачатку 80-ых гадоў пракладзены
прадуктаправод Дзісна-Мінск, па якім адбываецца перамяшчэнне прадукцыі
Наваполацкага НПЗ у сталіцу. Пасля пракладкі газаправода да раённага цэнтра ад
магістральнага трубаправода пачала фарміравацца сетка газаправодаў раёна, якая
ўжо перавысіла 100 км.
| 
